குறுந்தொகை 49 - நின் நெஞ்சு நேர்பவளே

நெய்தல் - தலைவி கூற்று

அணில் பல் அன்ன கொங்கு முதிர் முண்டகத்து

மணிக்கேழ் அன்ன மாநீர்ச் சேர்ப்ப

இம்மை மாறி மறுமை ஆயினும்

நீ ஆகியர் என் கணவனை

யான் ஆகியர் நின் நெஞ்சு நேர்பவளே.

 

-அம்மூவனார்

 

கொங்கு - பூந்தாது. முண்டகம் - முள்ளிச்செடி. மணிக்கேழ் – மணி நிறம். மா - கருமை. சேர்ப்பன் - நெய்தல் தலைவன்.

 

அணில் பல் போன்ற முட்களும்

முதிர்ந்த பூந்தாதும் கொண்ட

முள்ளிச்செடி படர்ந்த

நீலமணி நிறக் கடல் சூழ்

நெய்தல் நிலத்துத் தலைவனே!

இப்பிறவி போய் மறுபிறவி உண்டாயினும்

நீயே என் கணவன்.

நானே நின் நெஞ்சுக்கு ஏற்றவள்.