நெய்தல் - தோழி கூற்று
நெய்தற் பரப்பில் பாவை கிடப்பி
நின் குறி வந்தனென் இயல் தேர்க் கொண்க
செல்கம் செலவியங் கொண்மோ அல்கலும்
ஆரல் அருந்த வயிற்ற
நாரை மிதிக்கும் என்மகள் நுதலே.
-பொன்னாகனார்
பாவை - பொம்மை. குறி - குறித்த இடம். கொண்கன் - நெய்தல் நிலத் தலைவன். அல்கல் - இரவு. ஆரல் - ஒரு வகை மீன். நுதல் - நெற்றி.
தலைவனும் தலைவியும் சந்திப்பதற்காகக் குறித்திருந்த இடத்தில், தலைவியை விட்டு விட்டு வந்த தோழி, தலைவனுக்குச் சொன்னது.
கடற்கரை மணற்பரப்பில்
பாவையைக் கிடத்தி விட்டு
நின்னிடம் வந்துள்ளேன்.
நன்கு செய்யப்பட்ட தேரையுடைய
நெய்தல் நிலத் தலைவனே!
அங்கு செல்கின்றேன்.
தலைவியை அனுப்பி வை.
இரவு வந்தால்
ஆரல் மீன்களை வயிறு நிறைய உண்ட
நாரை மிதித்து விடும்.
என் மகள் நெற்றியை.
பாவை - கோரைப் புல், பஞ்சு, பூக்கள் ஆகியவற்றைக் கொண்டு செய்த பொம்மை. இவற்றை இளம் பெண்கள் தம் மகள்களாக எண்ணி விளையாடுவர் என்பது மரபு.
No comments:
Post a Comment