குறுந்தொகை 218 - விறல்கெழு சூலி

பாலை - தலைவி கூற்று

விடர் முகை அடுக்கத்து விறல் கெழு சூலிக்குக்
கடனும் பூணாம் கைந் நூல் யாவாம்
புள்ளும் ஓராம் விரிச்சியு நில்லாம்
உள்ளலும் உள்ளாம் அன்றே தோழி
உயிர்க்கு உயிர் அன்னர் ஆகலின் தம் இன்று
இமைப்பு வரை அமையா நம் வயின்
மறந்து ஆண்டு அமைதல் வல்லியோர்மாட்டே.

-கொற்றனார்

விடர் முகை - பிளவுபட்ட குகை. அடுக்கம் - மலை. விறல் - வீரம். சூலி - கொற்றவை. கடன் - பலி. கைந்நூல் - காப்பு. யாத்தல் - கட்டுதல். புள் - சகுனம். ஓர்தல் -ஆராய்தல். விரிச்சி - குறிகேட்டல். உள்ளுதல் - நினைத்தல். அன்று - அசைச்சொல். இமைப்பு வரை - இமைப்பொழுதும். ஆண்டு - அங்கு. அமைதல் - தங்குதல்.

தலைவன் பொருள் தேடிப் போயிருக்க, அவன் பொருட்டு சூலிக்கு வழிபாடுகள் செய்து வந்த தலைவி, அவன் திரும்பி வரத் தாமதம் ஆனபோது, தோழியிடம் சொன்னது.

பிளவுண்ட குகைகள் நிறைந்த மலை மீது உறையும்
வீரம் மிக்க சூலிக்கு
பலி கொடுக்க மாட்டோம்.
கையில் காப்பு கட்ட மாட்டோம்.
அவளிடத்தில் சகுனம் பாரோம்.
குறிகேட்டு நிற்கப் போவதில்லை.
அவளை நினைக்கவும் மாட்டோம், தோழி!
உயிர்க்கு உயிர் போன்றவர்.
இமைப்பொழுதும் பிரிய மாட்டாத நம்மை மறந்து
சென்ற இடத்திலேயே தங்கிவிட வல்லவர் பொருட்டு.