குறுந்தொகை 385 - புதுவோர்த்து அம்ம அழுங்கல் ஊரே

குறிஞ்சி - தலைவி கூற்று

பலவின் சேர்ந்த பழம் ஆர் இனக்கலை
சிலை வில் கானவன் செந்தொடை வெரீஇச்
செரு உறு குதிரையின் பொங்கிச் சாரல்
இரு வெதிர் நீடு அமை தயங்கப் பாயும்
பெரு வரை அடுக்கத்துக் கிழவோன் என்றும்
அன்றை அன்ன நட்பினன்
புதுவோர்த்து அம்ம இவ் அழுங்கல் ஊரே.

-கபிலர்.

பலவின் - பலா மரத்தின். ஆர் - உண்ணுதல். கலை - ஆண்குரங்கு. சிலை - சிலை மரம். தொடை - அம்பு. வெரீஇ - பயந்து. செரு - படைக்களம். இரு - பெரிய. வெதிர் - மூங்கில். அமை - கோல். தயங்க - அசைய. வரை - மலை. அடுக்கம் - மலைச்சாரல். அழுங்கல் - ஆரவாரம்.

தலைவிக்கு திருமணம் செய்ய பெற்றோர் முயற்சி எடுத்தபோது, தோழிக்கு தலைவி சொன்னது.

பலா மரத்துப் பழங்களை உண்ட ஆண்குரங்கு,
சிலை மரத்தால் செய்யப்பட்ட வில்லினை ஏந்திய
கானவனின் குறிதவறாத அம்புக்கு அஞ்சி,
போர்க்குதிரை போலப் பொங்கி எழுந்து
நீடுயர் மூங்கில்கள் அசையும்படி தாவும்
நெடிதுயர் மலைநாட்டுத் தலைவன்.
அவன் என்றும்
அன்று போலவே நட்பு உடையவன்.
புதியவர்களை திருமணம் பேசுவது
இந்த ஆராவாரமிக்க ஊர்தான்.