குறிஞ்சி - தலைவி கூற்று
அமர்க் கண் ஆமான் அம் செவிக் குழவி
கானவர் எடுப்ப வெரீஇ இனம் தீர்ந்து
கானம் நண்ணிய சிறுகுடிப் பட்டென
இளையர் ஓம்ப மரீஇய அவண் நயந்து
மனை உறை வாழ்க்கை வல்லியாங்கு
மருவினின் இனியவும் உளவோ
செல்வாம் தோழி ஒல்வாங்கு நடந்தே.
-ஐயூர் முடவனார்.
அமர் - விருப்பம். ஆமான் - காட்டுப்பசு. அம்செவி - அழகிய காது. குழவி - கன்று. எடுப்ப - ஒலி எழுப்ப. வெரீஇ - பயந்து. ஓம்ப - பாதுகாக்க. மரீஇ - பழகி. அவண் - அங்கு. நயந்து - விரும்பி. மருவுதல் - கலத்தல். ஒல்வாங்கு - இயன்றவரை.
தலைவனுடன் திருமணம் செய்ய விரும்பிய தலைவி, தன் விருப்பத்தை அவனுக்கு தெரிவிக்கும் விதமாய், தோழிக்குச் சொன்னது.
விரும்பத்தக்க கண்களையுடைய காட்டுப்பசு.
அதன் அழகிய காதுகள் கொண்ட கன்றுக்குட்டி
கானவர் எழுப்பிய ஒலிக்கு வெருண்டு
தன் இனத்தினைப் பிரிந்து
காட்டருகே சிற்றூர் சேர்ந்து
அங்கு இளம்பெண்கள் அரவணைக்க
அவ்விடம் பிடித்துப்போய்
மனை வாழ்க்கைக்கு வலிமை பெற்றது.
அது போல
கூடிப் பழுகுதலை விட இனியவும் உளவோ?
போவோம் தோழி!
தலைவன் இருப்பிடத்திற்கு.
இயன்றவரை நடந்து.
No comments:
Post a Comment